| مطبات الأنوثة |

في الآونه الأخيره اصبحنا نرى كثير من الفتيات فاهمات الانوثه غلط امثله بسيطه :

 

- صارت تنادي امها " مامي وابوها بابي " بعد ماكانت تقوليمه ويبه ، مادري وش دخلها في الانوثه من عرفت عمري وانا اقول يمه ويبه وفديتني وش ملحي ..!

- اذا شافتلها نمله بس نمله مب حشره قامت تطامر وتصارخ قائله " يامامي "حسره "يااي قررف ! وتلقونها يومها صغيره تلاحق فيهم وتتصيدلهم

حسره = يعني حشره في لغة الدلع عندهم

- ومنهم 24 ساعه يدها في شعرها جامعته على جنب يعنني البنت الكيووت الدلوعه اللي شعرها مااااره حرير " بترقيق الراء ، ترا ثلاث ارباع اللي حولك شعورهم ناعمه مادروا انها منوّل مغير طقاق هي واميمتها عند كدّ شعرها في كل صبحيه !

- بعد سنين من الموده والالفه بينها وبين عصير السنتوب وصاموليه الجبن حقت الفسحه فجأه قلب وااع ماحبه انا احب الفراوله  اقصد الستروبري وكرووسوون مادري من اللي لاعبن عليها وقايلها انها تندرج تحت مسمى الانوثة !

- والا اللي تجي رافعة خشمها ومحد قدها وباعلى صوتها تقول : نوو واااي مااعرف اطبخ ابدا ولاعمري دخلت مطبخنا ولا ادري وين مكان المواعين ولا افكرر من اصلا 
الله يصلحك ترا هذي اسمها رفاله مهب دلع وانوثه يا اللي منيب قايل ..

- والا اللي تصور عينها والا اطارف اصابعها اللي غاط نصها في المناكير من كثره تحسبه حنا وتنزل الصور في اما في المسن والا الفيسبوك والفلكر وغيرها وطبعا البنت مسكينه ماتدري مااا انتبهت كلها بالصدفه الضعيفة بالصدفه حطوا عليها عشرين خط ..

- وفجأه بينما انتي في حاله سكون تجيك وحده طاايره وتصاارخ يقعد الواحد ساعه يتنافض يدور باب الطوارئ واذا التفت تلقاها خامه خويتها وهي توها شايفتها امس ، هذا غير اللي تمشي وتحضن خلق الله حشا مندوبه مبيعات حنان واحضان مالي يومين اعرفها تجي هاااااي من اخر السي تصاارخ وااي اشتقتلك !
اللي اخبره ان السنه السلام على من عرفت وعلى من لم تعرف مافيه خمخمه وتتغيص لخلق الله !

- والا اللبسس ، حدث ولاحرج تلبس لين الركبه اذا مهب لين نص الفخذ وتتمايع قدام الله وخلقه وماتقول شخبارك وشخبار الاهل والوالدين لا قرويه انتي قديمه ..قولي : هااي وكيفك وترد ام فاااين ..!
فاين يصك جبهتها ان شاء الله  يعني صار الانقلش لغة الدلع والانوثه !
ابصم بالعشره انها ماحفظت الا هالكلمتين وجايه مسويتلي بلبل في الانقلش ، وعشان ما اصير كذابه يمكن تعرف تطلب من المطعم " يعني تو دبل برقر + 1 ببسي دايت "
طبعاً الدايت لزوم الانوثه كذالك لانها الفتاة التي تحافظ على رشاقة جسمها
بس مدري وين يروح دبل البرقر ذا ..!

الانقلش واللبس العاري كلها انوثة

نست والا تناست حديث الرسول -الله صلى الله عليه وسلم : (صنفان من أهل النار لم أرهما قوم معهم سياط كأذناب البقر يضربون بها الناس ونساء كاسيات عاريات مميلات مائلات رؤسهن كأسنة البخت المائلة لا يدخلن الجنة ولا يجدن ريحها وإن ريحها ليوجد من مسيرة كذا وكذا) 

وغيرها وغيرهااا

اي انوثه هذي ابفهم ..!

الانوثه هي اللي تتصرف على طبيعتها من غير اي تصنع
يكسيها الخجل - والودوده - الخدومه - الهادئه - السمحه الغير رافعة لخشمها -
المتمسكه بما كانوا عليه امهات المؤمنين رضي الله عنهن ..

نسأل الله السلامة ، والله يثبت كل من هو على حق ويهدي الجميع

ويستر علينا وعلى كل من يدور الستر ..